Nagapanindugan si Trisha Antiquera nga nagahambal ini sang matuod kag wala ini sang rason para maghimo-himo sang esturya angot sa pagkadula sang iya live in-partner, iloy kag live-in partner sang iya iloy.
Madumduman nga nangayo sang bulig ang 23 anyos nga si Trisha matapos nga wala nakapauli ang live in partner sini nga si Junel Nangan kag iya iloy nga si Loreville Antiquera kag live-in partner sang iya iloy nga si Joen Villacojer.
Sila ang ulihi nga nakit-an sa Brgy Vista Alegre, sang Hunyo 2, 2024, nga ginpasakay sa isa ka avanza taxi sang mga wala nakilal-an nga mga persona.
Suno kay Trisha, wala ini nagahimo sang esturya matapos nga makit-an na lamang ang bata sini nga apat ka tuig nga ginbilin sa ciudad sang bago nga may dugo pa ang panapton.
Sadto nakita sang personnel sang Bago City Police Station ang bata kag ginpatawag si Trisha, apang wala nagpatigayon sang imbestigasyon ang Bacolod Police Station 7 sa pagkakita sa bata
Dugang pa sini, kun matuod man ang siling sang kapulisan nga may contact ini sa iya nga pamilya, subong pa lamang naghipos na ini kag nagpadulong kun diin sila ilabi na nga kahapon ang kaadlawan sang iya iloy.
Pahayag ni Trisha, wala na ini nagpadulong pa sa Bacolod Police Station 7 bangod nga wala man ini sang may makuha nga update.
Padayon sa gihapon ang panawagan ni Trisha sa kun sin-o man ang nakakita sa iya mga himata nga mahimo magkoordinar sa kapulisan ukon sa estayon sang Bombo Radyo Bacolod.
Tubtob sa karun nagapangabay si Trisha nga yara sa maayo nga kahamtangan ang iya mga himata kag sila kun tani ang makapauli na.
