Gindagdagan na sang 60-day preventive suspension ang anay Acting Municipal Treasurer sang Isabela nga si Neneth Escarda matapos ginpapanaugan sang show cause order sang Provincial Legal Office kag sa iya sabat ginpatigayon ang preliminary investigation.
Suno kay Provincial Legal Officer Atty. Alberto Nellas Jr. sa resulta sang imbestigasyon, ang findings kag recommendations ang ila gin-submit sa gobernador.
Ginpaidalom sa formal charge sa kaso administratibo si Escarda nga nalakipan sang serious dishonesty, grave misconduct kag malversation of public funds.
Si Escarda ang nagapuyo sa Brgy. Taculing, ciudad sang Bacolod kag ini siya ang nagapauli adlaw-adlaw.
Sang January 21, 2023 ginreport ni Escarda sa Police Station 6 nga ginsulod sang mga kawatan ang iya balay kag ginkuha ang cash kag cheke nga collection sang banwa sang Isabela nga iya gindala bisan indi ini authorized nga dal-on pauli ang kwarta.
Nagdangat sa P6.4 million nga cash kag cheke ang nadula sa paghinakup ni Escarda kag bilang proseso samtang ginapatigayon ang hearing sa kaso, ginpaidalum sa 60-day preventive suspension si Escarda nga wala sang sweldo.
