Nagsungka subong nga hapon sa Office of the Vice Governor sa probinsya sang Negros Occidental ang anay alkalde sa banwa sang Isabela kag duha ka Punong Barangay nga may warrant of arrest sa kaso nga murder.
Ang mga nagsungka sa talatapan ni Vice Governor Jeffrey Ferrer amo sanday former Isabela Mayor Joselito Malabor, kasubong man sanday Punong Barangay Ammy Locsin sang Barangay Sinocauann kag Punong Barangay Arman Cordero sang Barangay Maytubig sa banwa sang Isabela.
Ang mga ini ang gindagdagan sang kaso nga murder angot sa pagpatay kay Moises Padilla Councilor Jolomar Hilario sadtong Marso 31, 2019, antes paman ang 2019 elections.
Madumduman nga madamo man sang mga Municipal Councilor ang naangot sa kaso kalakip na si Moises Padilla Mayor Ella Yulo, kun sa diin iban sa mga ini ang nagpyansa kag iban ang yara sa kustodiya sang National Bureau of Investigation (NBI).
Kaupod man sang mga nagsungka ang ila legal council nga si Atty Jomax Ortiz.
Suno kay Vice Governor Jeffrey Ferrer, nagtawag ang mga ini nga luyag nila magsungka sa Office of the Vice Governor kag luyag man sang mga ini nga sa idalum sang NBI ikustudiya.
Bukas naman ang opisina ni Ferrer sa mga kaangay nga sitwasyon kag ginapakamaayo nga ginasaligad ini sang mga suspetsado.
Nagpasalig naman ini nga bukas ang iya talatapan sa mga kinahanglan sang supporta, kinahanglan sang bulig kasubong man ang pagfacilitate sang mga kaangay nga sitwasyon.
