Ginpanindugan ni former Isabela Mayor Joselito Malabor, nga harrasment para sa ila ang pagpasaka sang kaso nga murder angot sa pagpatay kag late Moises Padilla Councilor Jolomar Hilario nga ginalantaw sini nga politically motivated apisar nga wala man sila sang ihibalo.
Madumduman nga nagsungka kahapon sa Office of the Vice Governor sa probinsya sang Negros Occidental sanday former Isabela Mayor Joselito Malabor, kasubong man sanday Punong Barangay Ammy Locsin sang Barangay Sinocauann kag Punong Barangay Arman Cordero sang Barangay Maytubig sa banwa sang Isabela.
Ginpatay sadtong Marso 31, 2019 ang konsehal kag pila ka mga opisyales sa Moises Padilla kag Isabela ang gintudlo sang naga-isahanun nga witness nga may kahimuan sang krimen.
Pahayag ni Malabor nga sa tion nga magdaog ang ila Petition for bail sa patigayunon nga hearing bwas, gilayon man nila nga bayaran ang pyansa.
Suno pa diri nga bisan si Moises Padilla Mayor Ella Yulo nga kaupod man nga ginkasuhan ang nagapati nga politically motivated ang krimen, nga ila man nga ginatindugan bangod halos mga politiko ang kalabanan sa gin-akusar.
Apang ginakatingala naman sini kun ngaa naulamid sila nga opisyales sa banwa sang Isabela sa pagpatay sa konsehal sa banwa sang Moises Padilla nga wala man sila sang kaangtanan.
Paathag ni Malabor nga ang warrant of arrest sa kaso nga murder nga ginpanaog sa ila ang ikalima na nga kaso bangod ang apat ka kaso sang murder ang lunsay nadismiss.
Aminado naman ini nga nagdihon na sang affidavit of recantation ang witness nga nagapahayag nga ginpilit lang ini sa pagpirma sa mga naulamid nga mga pangalan, nga amo kuntani ang magapugong sa pagsaka sang kaso sa piskal.
