Gin-appoint si anay Bacolod City Councilor Jocelle Batapa-Sigue bilang undersecretary sang Department of Information and Communications Technology kag nagsugod na ini sa pagtrabaho subong nga adlaw, Agustop 4.
Sa interview sang Bombo Radyo kay Sigue, nahatagan ini sang tsansa nga mangin undersecretary bangud sa vision ni Secretary Ivan John Uy nga madala ang inclusive growth bisan sa malayo nga mga lugar.
Nagapati si Sigue nga may maayo sila nga team sa DICT gani tuman ang iya pasalamat sa kahigayunan nga makaserbe bilang undersecretary sang ahensya.
Suno sa anay konsehal sang Bacolod, personal siya nga nag-apply kag nagtanyag sang suporta kag bulig sa anuman nga kapasidad bangud kilalahay na sila ni Secretary Uy halin pa sang tuig 2012 bangud ang tiglikom sang commissioner sang ginbungkag na nga Commission on ICT sa idalom ni anay Presidente Noynoy Aquino samtang si Sigue naman ang presidente sang National ICT Confederation of the Philippines.
Nag-updanay man sila sa Senado sa pagdepensa sa hagna nga ginfile ni Senator Sonny Angara nga magtukod sang Department of Information and Communications Technology nga dedicated para sa digital advocacy and concerns.
Duha ka bulan ang paghulat ni Sigue tubtub nga nag-abot ang kopya sang appointment papers alas-5:00 kahapon sang hapon nga nagapahibalo nga mareport ini sa DICT office sa Quezon City alas-8:00 kaina sang aga kag subong nga adlaw, nagsugod na ini sa pagserbe bilang undersecretary.
Nagpalab-ot man sang pagpanginbulahan si Bacolod City Lone District Rep. Greg Gasataya kay Sigue sa iya nga appointment.
Suno kay Gasataya, kaupod niya ang undersecretary sa Sangguniang Panlungsod sang Bacolod sang tuig 2004.
