Naghina na sa Low Pressure Area (LPA) ang anay Bagyo MAYMAY kaina alas-2:00 sang kaagahon.
Ang LPA ang yara sa 565 km nasidlangan sang Echague, Isabela.
Samtang, padayon man nga ginabantayan ang tropical cyclone sa gwa sang Philippine Area of Responsibility (PAR) nga may international name nga Dolphin.
Ini ang padayon nga nagahulag sa northeast sang Extreme Northern Luzon sa kalayuon nga 1,095 km.
Ini ang may kabaskugon sang hangin nga nagadangat sa 140 km/h kag pagmadlos nga tubtob 170 km/h.
Nagahulag ini sang 20 km/h padulong sa west northwestward nga direksyon.
Sa pihak nga bahin, maeksperyensyahan gihapon ang epekto nga dala sang Southwest Monsoon ukon hanging habagat sa bahin sang Central kag Southern Luzon subong man sa western section sang Visayas.
Lauman ang pagbubo sang ulan sa Occidental Mindoro dala sang habagat.
Maeksperyensyahan naman ang tumalagsahon nga mga pag-ulan sa Metro Manila, Pangasinan, La Union, Benguet, Zambales, Bataan, Tarlac, Pampanga, Bulacan, Rizal, Cavite, Batangas, Laguna, kag Antique dala gihapon sang habagat.
Samtang, lauman ang lapta-lapta nga mga pag-ulan sa Batanes kag Babuyan Islands tuga sang trough sang bagyong Dolphin.
Lauman man ang lapta-lapta nga pag-ulan sa nabilin nga bahin sang Luzon kag Western Visayas tuga sang habagat.
Samtang, sa nabilin nga bahin sang pungsod, maeksperyensyahan ang pugtak-pugtak nga pag-ulan tuga sang localized thunderstorms.
