Patay ang anay kagawad sang Barangay Malasibog, Escalante City, Negros Occidental matapos gintiro sa National Highway sang Sitio Tanquinto, Barangay Mabini, Escalante City kahapon sang aga.
Ginkilala ang biktima kay Ernesto Valiente, 60 anyos kag nagapuyo Purok Balok, Barangay Malasibog sa amo man nga syudad.
Sa interview sang Bombo Radyo Bacolod kay Police Major John Despi, hepe sang Escalante City Police Station, nagalakat ang biktima sa national highway sang gintiro sang wala makilal-an nga suspetsado kag nakaagom sang walo ka igo sa nagkalain-lain nga bahin sang lawas.
Ginhingagaw pa sang pamilya ang biktima sa ospital apang gindeklarar nga dead on arrival.
Suno kay Despi, may narekober nga lima ka basiyo kag isa ka balines sang kalibre 45, subong man isa ka basiyo sang M16 armalite rifle.
Suno sa hepe, padayon pa ang imbestigasyon sa krimen agud matumod ang motibo pagpatay sa biktima.
