Patay ang anay Barangay Tanod matapos nga gintiro sang wala makilal-an nga suspetsado sa isa ka tiyangge sa corner sang Rizal kag Hilado Streets sa Barangay 22, Bacolod City, kagab-i, Marso 13.
Ginkilala ang biktima nga si Ruben Altamira, residente sang Purok Gahili-ugyon, Barangay 23, Bacolod City kag nagatrabaho sa nagabulante sang tela sa ila nga lugar kag isa man ini ka anay Barangay Tanod.
Sa interview sang Bombo Radyo Bacolod kay Police Captain Efren Legada, station commander sang Bacolod Police Station 1, nga nagainom sang beer ang biktima sa tiangge sang may duha ka lalaki ang nagasuksok sang facemask ang nagpalapit man sa tiyangge.
Nagbakal sang softdrinks kag nagpakuno-kuno nga nagapamahaw apang hinali lang gintiro sang makapila ka beses ang biktima nga nagresulta sa kamatayon sini.
Suno kay Legada, base sa impormasyon, gin-alegar nga nakaistoryahanay pa ang biktima kag ang mga suspek antes natabo ang krimen.
Ginatumod pa sa karun kilalahay ang suspek kag biktima.
Suno sa station commander wala man sang record ang biktima sa Barangay kag ginakuha ini agud nga mangin Barangay Tanod apang wala nadayon bangud wala siya ginpasugtan sang iya pamilya.
Nagapadayon sa karun ang pagpanipon sang mga kapulisan sang CCTV footages agud nga magamit sa pagtumod sang suspetsado kasubong man sa motibo sang krimen.
