Ginapaboran sang anay college dean kag lead convenor sang Team Pinas ang posisyon sang amici curiea ukon friends of court nga ang mga nakapamati ukon nakatambong lamang sa impeachment trial amo ang makaboto sa conviction.
Sa interview sang Bombo Radyo Bacolod kay Dr Gary Dionesio, former dean sang School of Diplomacy and Governance sang De La Salle-College of Saint Benilde humalin sang 2019, importante ang pagpatawag ni Trial Presiding Officer Sen. Francis “Chiz” Escudero sang amici curiea para mahangpan sang mga pumuluyo ang importansya sang threshold.
Paathag ni Dionesio nga sang ginhuman ang konstitusyon, ginakonsiderar sang layi nga ang tanan nga mga Senador ang handa nga tumanon ang ila responsibilidad sa pagboto kag magatambong gid sa impeachment trial.
Apang lain ang karun nga sitwasyon bangod may ara sang wala naka-takeoath, may nagapanago bangod sa warrant of arrest, may duha nga napriso, kag may naka-medical leave sa luwas sang pungsod.
Suno kay Dionesio, ang dapat mahisayran amo ang kilalahon nga two-thirds, kun ini ang ibase sa kabug-usan nga Senador kalakip ang absent, ukon sa mga present lamang kag makatuman sang ila obligasyon.
Pahanumdom sang dean nga sa eskwelahan, kun may-ara sang group report ukon thesis, indi pwede nga parehas lang ang grado sa miyembro nga wala sang kontribusyon sangsa mga nagpreparar gid.
Mangin kwestyonable suno diri kun hatagan sang safe privilege ukon tugutan nga mangin free rider ang mga wala sang binuligan.
Pahanumdom niya nga sa layi, may-ara sang mga exemption.
Kaangay man ini sa kinamatarong sa free speech, nga may limitasyon bangod sa cyberlibel.
Suno kay Dionesio, apisar may kinamatarong sa free speech, bawal ang magsinggit sa sunog sa sulod sang sinehan, kag bawal man ang magsinggit nga may bomba sa airport.
