Nagapati ang anay Commissioner sang Commission on Elections nga indi na matapos sa 19th Congress ang impeachment kay Vice President Sara Duterte kag ang complaint ang magabalik sa panugod sa 20th Congress.
Sa interview sang Bombo Radyo Bacolod former Comelec Commissioner Rowena Guanzon, wala na tyansa nga matapos ang impeachment trial bangod nag-adjourn na ang Senado kag sila ang magabalik sa Hunyo 3, samtang sa Hunyo 29 naman magatakop ang 19th Congress.
Suno diri, amo man ang opinyon ni former Chief Justice Antonio Carpio.
Pahayag sini, matapos sang May 12 National and Local Elections, magabag-o naman ang pila sa mga Kongresista kag Senador sa 20th Congress gani magaback-to-zero ang impeachment complaint.
Ini ang mahimo nga ma-edorso sang isa ka kongresista apang ini ang mas madugay, gani mas dako ang posibilidad nga articles of impeachment gihapon ukon pagkuha sang pirma sang one-third sang members sang House of Representative agud maderekta sa Senado.
Sa karun suno diri, madamo pa sang mga pro-Duterte sa Senado, kag balantayan kun ano ang mangin tikang ni Senate President Francis “Chiz” Escudero, kun dayunon sini kag padasigon ang impeachment trial.
Gindumdom man sini nga sang nakaligad, ginapahayag ni President Ferdinand “Bongbong” Marcos Jr. nga madamo pa sang trabaho kag usik sa oras ang pagfile sang impeachment apang nakita sini nga kaangay nga naglain ang tono.
Suno diri, ginhambal sini sa iya bata nga si Ilocos Norte 1st District Representative Sandro Marcos nga himuon ang trabaho kag amo ang una nga nagpirma sa impeachment complaint, samtang first cousin man sini si House Speaker Martin Romualdez nga amo ang nagaduso sang tikang.
Nagapati si Guanzon nga luyag ni PBBM nga mapadayun ang ila legasiya, apang bangod bata pa si Sandro, si Romualdez ang pinakamalapit nga mahimo mabulos nga Presidente.
Suno diri, ang mayor nga purpose sang impeachment amo nga maknockout si VP Sara.
Apang nakita man sini nga nagbaskog pa ang panindugan sang Bise President sa pagpapili sa Presidency sa 2028, bangod ini na lamang ang iya nga mahimo.
