Arestado ang isa ka anay confidential informant sang Criminal Investigation and Detection Group (CIDG) matapos makit-an nga may dala nga armas nga wala sang nagakaigo nga dokumento sa checkpoint sa Seaview Highway, Barangay Guinhalaran, ciudad sang Silay sang Marso 16. ala 1:15 sang kaagahon.
Sa interview sang Bombo Radyo kay Police Lt. Guilmor Cuare, deputy chief of police sang Silay City Police Station, ginkilala ang suspetsado kay Delvie Rodriguez, 43 anyos kag residente sang Purok Baybayon, Barangay Guinhalaran, Silay City.
Suno kay Cuare, indi rehistrado ang motorsiklo nga ginamaneho ni Rodriguez kag nagpahayag ini nga miyembro siya sang CIDG ukon pulis.
Ginpangitaan ini sang ID nga nagapaamatuod nga siya ang isa ka pulis apang wala ini sang may ipakita gani ginpangayo lang ang iya nga lisenya agud mapamatud-an nga legal ang iya pagdala sang motorsiklo.
Suno sa deputy station commander, yara sa iya box sa motor ang lisensya kag pagbukas sini, nakit-an ang isa ka shooter elit .45 calibre pistol, magazine nga may pito ka mga live ammunition, chamber nga loaded sang tatlo ka spare magazines kag may 21 ka mga live ammunitions.
Sang siya ang ginpangitaan sang nagakaigo nga dokumento wala ini sang may mapakita.
Ginverify ang iya nga ID kag nahibaluan nga isa siya ka confidential informant sang CIDG-Bacolod apang expired naman ang iya nga ID.
Sa karun nakahunong si Rodriguez sa Silay City Police Station kag natalana nga pasakaan sang nagakaigo nga kaso.
