Ginbaton na ni anay councilor Caesar Distrito ang tanyag sa iya nga mangin running mate ni anay 3rd district Congressman Albee Benitez para sa 2022 local election kag magapadalagan bilang bise alakalde sa syudad sang Bacolod.
Nagpagwa sang official announcement si Distrito sa proposal kun sa diin ginpahayag sini nga naghaylo ini sa partido ni Benitez bangod sa mga programa sini nga ginplastar.
Madumduman nga ang anay konsehal ang kaupod man sadto sa Grupo Progreso nga ginapamunuan ni Incumbent Bacolod City Mayor Evelio “Bing” Leonardia.
Kadungan sa paghaylo sang grupo sang anay konsehal, kaupod man sini nga nagsaylo sa partido ni Benitez ang iya iloy nga si Councilor Simplicia “Simple” Distrito, kasubong man si Councilor Bart Orola nga magapareelect bilang konsehal.
Magapadalagan man sa idalum sang partido ni Benitez ang bata ni anay late Bacolod City Councilor Elmer Sy, nga si Pao Sy, kag kalakip man sa magapapili si Councilor Al Victor Espino.
Madumduman nga si Espino ang naghalin sa Grupo Progreso bangod sa alegasyon sini nga siya ang ginapwa, samtang sa pihak nga bahin nagpanginwala naman ang grupo nga ginpahalin nila si Espino.
Sa Official Announcement, ginpasalig ni Caesar Distrito nga kun hatagan ini sang kahigayunan nga mangin bise alkalde, sinsero ini nga magaserbisyo kutob sa iya masarangan, kag pagabayluhan sini sang sobra pa nga pagpangalagad kag paintindi ang pagpili sa iya.
Dugang pa sang anay konsehal nga igahatag man sini ang mga panginahanglanon sang tagsa ka mga Bacolodnon.
Apisar sa pagbaylo sang partido, ginpasalamatan man ni Distrito ang oportunidad nga nangin kabahin ini sa Grupo Progreso sa sulod sang tatlo ka eleksyon kag nagseparar sang banas nga wala sang kalain sang buot.
