Dakop ang ginaalegar anay drug surrenderer sa syudad sang San Carlos, Negros Occidental sa joint buybust operation sang PDEA Negros Occidental Provincial Office kag San Carlos City Police Station kahapon sang aga sa Brgy 5, San Carlos City.
Sa interview sang Bombo Radyo Bacolod kay PDEA-Negros Occidental chief Nicholas Gomez, ang suspetsado ang ginkilala kay Joemarie Babor alias ‘Tata Babor’ kag yara sa top 10 provincial target list.
Nakuha sa paghinakop sini ang kapin napulo ka gramos sang suspected shabu kag ginabanta nagabalor sang P68,000.
Suno kay Gomez, isa man si Babor sa ginamonitor sang San Carlos City Police Station kag isa man ini sa nareport nga nagabaton sang illegal nga druga nga ginpanagtag man sang drug supplier sa syudad.
Suno pa diri, anay drug surrenderer man ang suspetsado sa syudad sang San Carlos.
Ginpahayag man ni Gomez nga padayon pa nga ginaimbestigaran ang suspetsado agud mahibaluan kun sa diin ini nagakuha sang supply sang illegal nga druga.
Yara na sa paghinakop sang PDEA-Negros Occidental ang suspetsado kag natalana nga pasakaan sang kaso nga paglapas sa RA 9165 ukon Comprehensive Dangerous Drugs Act of 2002.
