Nagpadulong sa estasyon sang Bombo Radyo Bacolod ang anay empleyado sang isa ka cafe sa ciudad sang Bacolod para magreklamo matapos nga wala masweldohan.
Paagi sa “Ipa-Bombo Ta” segment sang Bombo Radyo Bacolod, ginsaysay ni Alyas Rolan nga nagtrabaho ini sa Pasad Cafe sang Marso apang nagresign ini matapos ang duha ka bulan.
Suno diri, nagdesisyon siya nga magresign sang ginpakahuy-an siya sa meeting sang bana sang iya amo.
Sang nagpasa ini sang resignation letter ginpasalig ini nga mabaton niya ang iya sweldo nga P6,569 kun matapos na ang inventory.
Nakig-angot man ini sa in chrage sang inventory apang siya ginhambalan nga wala pa natapos ang inventory.
Sunod diri siya nakig-angot sa HR apang siya ginarasonan man.
Pahayag ni Rolan, anum ka bulan na ang naglabay kag tubtob sa karun wala pa ini sang may nabaton kag nagakagastohan ini sang byahe halin sa ciudad sang Cadiz padulong sa Bacolod para magfollow-up sa iya sweldo.
Sa karun nagapangabay ini nga kun tani ihatag sang insakto ang iya sweldo.
Samtang, may yara man sang impormasyon nga nakuha ang Bombo Radyo Bacolod nga may natabo man nga kaangay nga scenario sa empleyado sang cafe sa iban sini nga branch.
