Nagapati si anay Negros Occidental Governor Rafael ‘Lito’ Coscolluela nga ini na ang tion nga makit-an sang mga Pilipino ang maayo nga hinimuan ni anay Presidente Benigno Simeon ‘Noynoy’ Aquino III subong nga nagtaliwan na ini.
Sa interview sang Bombo Radyo kay Coscolluela, nakibot ini sa kamatayon sang anay presidente bangud wala sang naggwa nga balita nga nagabalik-balik na ini sa ospital bangud sa balatian.
Apang makabig ini nga blessing in disguise suno kay Coscolluela bangud indi na mag-antos ang anay presidente.
Matalupangdan suno sa anay gobernador nga matapos ang anom ka tuig nga pagpungko ni Aquino, mas ginatamod ang malain nga butang sangsa maayo niya nga hinimuan.
Sa pihak sini, indi mahimutig suno kay Coscolluela nga si Aquino ang most accomplished president sang Pilipinas bangud sa hinimuan niya sa ekonomiya.
Indi perpekto ang presidente suno sa anay opisyal apang wala ini sang rekord sang korapsyon sa iya opisina.
Ang weakness lang ni PNoy suno sa iya amo nga indi ini pulitiko sa batasan gani madamo ang wala nakahibalo sang iya hinimuan kag mas nadumduman ang natabo sa SAF 44.
Sa karon nga patay na si Noynoy suno kay Coscolluela, mahimo nga mangin tion na ini agud matalupangdan ang maayo niya nga hinimuan para sa pungsod.
Aminado ini nga bangud indi makahibalo mamulitika si PNoy, halos wala ini naappreciate sang kadam-an kag ginakabig nga elitista.
Wala man sini ginsapak ang mga kritisismo batok sa iya kundi nagtutok ini sa pagpangita sang solusyon sa problema bangud ang pagserbisyo ang iya ginapanumdom.
Suno kay Coscolluela, mas mahatagan sang pagkilala si Aquino subong nga patay na ini sangsa siya ang buhi.
