Suportado sang anay taglikom sang Department of Health (DOH) ang pagpili sang national government sa Sinovac bilang COVID-19 vaccine.
Nahibaluan nga nag-secure na ang Pilipinas sang 25 million doses sang COVID-19 vaccine nga gindevelop sang China.
Sa interview sang Bombo Radyo Bacolod kay Iloilo First District Representative kag anay DOH Secretary Janette Garin, ginpahayag sini nga kun siya ang papilion, mas pilion sini ang Sinovac kag Sinopharm nga himo sang China nga may yara sang 78-79% efficacy rate nga mas manubo naman kun ipaanggid sa Pfizer kag Moderna.
Suno sa anay Health secretary, ang Sinovac kag Sinopharm ang lunsay inactivated vaccines ukon himo sa ginpatay nga virus mismo agud ma-expose ang immune system sa virus kag mag-trigger sang mas madamo nga anti-bodies agud makapugong sang infection.
Dugang pa sini nga ang Sinovac kag Sinopharm ang naggamit sang traditional method sang paghimo sang bakuna ukon RNA vaccines nga madinalag-on nga gingamit man sang iban pa nga mga bakuna kaangay sang rabies.
Samtang, ang mga bakuna nga himo naman sang Moderna, Pfizer kag iban pa ang lunsay mga mRNA vaccines ukon porsyon lamang sang genetic code sang coronavirus ang gin-inject sa lawas nga naga-trigger nga maghimo sang viral proteins agud makabato ang immune system sa virus.
Suno kay Garin, ang mRNA vaccines ang bag-o nga type sang bakuna kag wala pa sang madinalag-on nga bakuna himo sang metodo nga ini ang ginagamit sa karon.
