Posible nga ma-dismiss sa serbisyo ang anay hepe sang Argao Municipal Police Station sa southern Cebu nga nadakpan nga nagahulid sang babaye nga priso sa iya nga kwarto sa police station.
Suno kay Bacolod City Police Office (BCPO) Director Police Colonel Henry Biñas, makabig nga gross miscounduct ang ginhimo ni Police Major Ildefonso Miranda Jr., 46-anyos nga nadakpan nga nagatulog upod ang 23-year-old inmate nga si Jean Claudia de Guzman nagligad nga semana.
Suno kay Biñas, dismissal from service ang pinakadako nga penalidad sa ginhimo ni Miranda.
Nahibaluan nga magluwas kay De Guzman, nagatulog man sa opisina ni Miranda ang 40-anyos nga si Brenda Cutillar.
Ang duha ka mga priso nga mga babaye ang nagapangatubang sang kaso may kaangtanan sa iligal nga druga.
Sa karun nagapangatubang na sang kaso si Miranda nga paglapas sa Republic Act No. 3019 ukon Anti-Graft and Corrupt Practices Act, direct bribery, kag Article 156 sang Revised Penal Code which pertains to the delivery of prisoners from jail.
