Arestado ang anay informant man sang mga kapulisan sa drug buybust operation nga ginpatigayon sang Bacolod Police Station 4 sa Purok Sunflower, Barangay Villamonte, Bacolod City kagab-i.
Sa interview sang Bombo Radyo kay Police Major Jun Ray Batadlan, station commander sang Bacolod Police Station 4, ginkilala ang suspetsado kay John Michael Bedis, 27 anyos, residente sang nasambit nga lugar kag nagabulig-bulig man sa mga kapulisan hatag sang impormasyon tuhoy sa mga nagabaligya sang illegal nga druga.
Suno kay Batadlan, temporaryo lang ini nga nagapuyo sa Barangay Villamonte bangud siya ang taga ciudad gid sang Kabankalan.
Nakuha sa iya paghinakop ang isa ka elongated transparent plastic sachet sang suspected shabu nga amu ang buybust item, isa ka medium heat sealed plastic sachet sang suspected shabu, duha ka big heat sealed transparent plastic sachet sang suspected shabu, isa ka green nga coin purse kag P500 nga buybust money.
Ang nakumpiskar nga illegal nga druga ang ginabanta nagabug-at sang apat ka gramo kag may estimated market value nga P27,000.
Sa karun nakahunong si Bedis sa Bacolod Police Station 4 kag natalana nga pasakaan sang kaso nga paglapas sa R.A. 9165 ukon Comprehensive Dangerous Drugs Act of 2002.
