Ginpaambit sang anay instructor sa Regional Training Center sang Philippine National Police nga kontrol, disiplina sa kaugalingon kag respeto sa kinamatarong sang kada tawo ang numero uno nga ginatudlo sa mga pulis.
Sa interview sang Bombo Radyo kay Retired Col. Armando Tubongbanua, mangin siya ang nakapamuyayaw sang iya nakit-an ang video kun sa diin ginluthang ni P/Sr. Master Sgt. Jonel Nuezca ang 52 anyos nga si Sonya Gregorio kag 25 anyos sini nga bata nga si Frank Anthony sa tunga sang mainit nga argumento nahanungod sa “boga” kag right of way sa Paniqui, Tarlac.
Suno kay Tubongbanua, may yara sang sala si Nuezca kag apisar nga may mga bayolasyon gid man ang mga biktima, indi insakto ang manner sang pag-aresto sang pulis.
Suno sa iya, posible nga na-overwhelmed ang suspetsado kay kulang sa schooling apisar nga mataas na ang iya nga ranggo.
Apang ang rules for engagement, respect for human rights kag maximum tolerance suno sa anay instructor ang indi na dapat bag-o sa ila gani nagakompormi ini sa pahayag ni Presidente Rodrigo Duterte nga posible man topak gid man si Nuezca.
Gindugang man sini nga dapat lang nga magpalupok ang isa ka pulis kun wala na ini sang choice kag nabutang na sa alang-alang ang iya kabuhi ukon sang sibilyan.
Administrative kag criminal cases ang ipasaka kay Nuezca kag dako ang posibilidad nga madismiss ini sa serbisyo kag madetain suno kay Tubongbanua.
Nagalaom man ini nga kabigun sang tanan ang hitabo nga isa ka leksyon kag nagapangabay nga indi na masulit pa.
