Ginpahayag sang anay konsehal sa ciudad sang Bacolod nga madugay na nga practice sa election sa Pilipinas ang paghatag sang mga contractor sang kontribusyon sa mga kandidato.
Mahibaluan nga gin-ako ni Centerways Construction and Development Inc. president Lawrence Lubiano nga nagdonar ini sang P30 million kay Senate President Francis “Chiz” Escudero sa kampanya sini sa 2022 elections.
Sa interview sang Bombo Radyo kay Atty Renecito Novero, madugay na nga nagakatabo nga nagahatag sang donasyon ang contractors sa mga kandidato sa eleksyon kag ini nagakatabo bisan diri sa ciudad sang Bacolod ukon sa probinsya sang Negros Occindental apang nagahipos lamang ang tanan.
Suno diri, santo sa Batas Pambasa Bilang 881, Article XI Section 95, wala ginpahanugotan ang paghatag sang kontribusyon sang contractor sa nagapapili nga kandidato bisan ini direkta ukon indi man direkta nga ginhatag.
Pahayag ni Novero, ini agud indi maimpluwensyahan ang resulta sang eleksyon kag ang politiko.
Dugang pa sini kun magdaog ang kandidato nga ginasuportahan sang contractor mahimo nga hatagan sang pabor ang contractor para makakuha sang proyekto ukon kontrata kag dira na nagasulod ang korapsyon.
Para sa abogado, kun seryuso ang gobyerno mahimo na nga mapasakaan sang kaso si Senator Chiz bangod nag-ako na mismo si Lubiano sa ginkontribusyon sini senador sang eleksyon.
Samtang, indi man mataas ang paglaum ni Novero nga resulta sang hearing angot sa flood control project sa kongreso.
