Nagapati si Former Bacolod City Councilor Atty Archie Baribar nga may yara sang korapsyon nga nagakatabo sa pagpatuman sang towing kag clamping sa ciudad sang Bacolod.
Sa interview sang Bombo Radyo kay Baribar, nagpadala ini sang sulat sa Sangguniang Panlungsod matapos nga imbulbado ang isa ka miyembro sang pamilya sini sa gintow ang salakyan, apang ang nag-issue sang resibo amo ang Metro Towing Services nga dapat iya sang ciudad nga trabaho.
Suno diri, tanan nga penalties nga yara sa ordinansa ang sakop sang ciudad kag indi sa private group, apang kun may yara man sang pribado nga grupo nga pasudlon dapat ini mag-agi sa contract of service agud mahatagan sang authority nga sila maka-issue.
Para kay Baribar, ang natabo nagapakita lamang nga may yara sang korapsyon nga nagakatabo.
Ini man bangod nga sa ordinansa, nakabutang nga 25 porsyento sang collection ang makadto sa ciudad samtang 75 porsyento naman ang makadto sa Metro Towing Services.
Isa pa gid sa pamangkot sang abogado amo nga, Disyembre 31 , 2023 na-expire ang kontrata sang Memorandum of Agreement sa tunga sang ciudad kag Metro Towing Services, apang paano nga tubtob sa karun nagapadayon ang pagpang-tow kag clamp sa ciudad dugang pa nga wala man sang automatic renewal sang kontrata.
