Personal grudge ang ginalantaw nga motibo sa pagpangluthang sa isa ka anay konsehal sa banwa sang Salvador Benedicto sa Barangay Abu-abu, Murcia, Negros Occidental.
Nahibaluan nga nagasakay sa isa ka pula nga salakyan ang biktima nga si Eddie Ceralbo, 59 anyos kag residente sang Barangay Pandanon, Salvador Benedicto, Negros Occidental sang hinali lamang ini nga ginluthang sang duha ka person nga nagasakay sa motorsiklo kun sa diin nakaangkon ini sang pilas sa liog.
Suno sa mga pumuluyo, wala sang face mask ukon helmet ang suspetsado kag matapos ginluthang si Ceralbo, nagpadulong sila sa wala mahibaluan nga direksyon.
Una nga gindala sang mga abyan sini si Ceralbo sa Municipal Health Center sa banwa sang Murcia apang ginrefer ini sa ospital sa syudad sang Bacolod agud madapatan sang dugang nga pagbulong.
Narecover sa crime scene ang duha ka empty shell sang 9mm pistol.
Sa interview sang Bombo Radyo Bacolod kay Police Lt. Frankie Paciente, deputy chief sang Murcia Municipal Police Station, may yara na sila sang person of interest kag ila pa pagatsekyaron subong nga adlaw kun nakagwa na sa ospital ang biktima agud makuhaan sang statement.
Suno kay Paciente, nakilal-an ni Ceralbo ang itsura sang mga suspetsado bangud wala sila sang facemask kag helmet.
Personal grudge naman ang ginalantaw nga motibo sang krimen bangud wala man ini sang madalum nga nakontra sang siya ang nagapungko bilang SB member sadto.
