Arestado ang anay liaison officer sang kontrobersiyal nga RGS World Marketing Corporation nga nagatanyag sang double your money scheme matapos nga ginserbehan sang warrant of arrest sa kaso nga syndicated estafa.
Sa interview sang Bombo Radyo kay Police Major Ellendie Rebusquillo, hepe sang Binalbagan Municipal Police Station, si Henjie Cuadra ang gindakop sa pagpanguna sang Provincial Intelligence Unit kag sa bulig sang Binalbagan Municipal Police Station.
Suno diri, ang warrant of arrest ang ginserbe kay Cuadra sa balay nga iya ginarentahan sa Brgy. San Teodoro, Binalbagan kahapon sang hapon bangud nagapangtakod ini sang CCTV camera bilang negosyo.
Suno sa hepe, ang warrant of arrest nga napetsahan Agusto 15 subong nga tuig ang gin-issue ni Judge Maria Lina Palencia Gonzaga, presiding judge sang 6th Judicial Region Branch 42, Bacolod City.
Ang syndicated estafa ang isa ka non-bailable nga kaso.
Madumduman nga sang tinalikdan nga tuig, madamo ang nagreklamo nga nagahulat sila sang pay-out sa kantidad nga ila gin-invest sa RGS World Marketing Corporation kun sa diin ang P1,000 ang mahimo nga P3,500 ukon masobra sa pilo sang ginpay-in.
Nagpagwa naman ang Securities and Exchange Commission sang cease and desist order batok sa korporasyon.
