Nagtaliwan na ang anay manager sang Negros Slashers kag beterano nga basketball coach nga si Oscar “Dodong” Bascon sa edad nga 86 kahapon.
Sa interview sang Bombo Radyo sa bata sini nga si Negros Occidental 5th District Board Member Tinto Bascon, nagakasubo ang ila nga pamilya sa pagtaliwan sang amay apang nagapasalamat nga nangin malinong ang iya kamatayon kag wala na ini nag-antos.
Suno kay Board Member Tinto, isa ka semana nga nagtinir sa ospital ang iya amay bangud sa ginabatyag sini sa iya tagipusuon kag nagasuprer man sang stroke apang kahapon, alas 2:55 sang hapon, nagginhawa lang ini sang madalom kag nadulaan na sang kabuhi.
Gin-athag man sini nga indi COVID-19 ang kabangdanan sang kamatayon sang amay kundi natural sickness.
Apisar nga ginkuha na sang Ginoo ang ila nga padre de pamilya, nagapati ang bata nga Bascon nga may maayo nga tinutuyo ang Diyos.
Ginapabugal sini ang mga binuhatan sang iya nga amay sa patag sang hinampang subong man sa negosyo.
Nagpasalamat man ini sa mga Bacolodnon kag Negrosanon nga nagpalambot sang ila mga simpatiya kag nagpangabay nga kuntani indi gid pagkalimtan ang mga legasiya sang amay.
Nagpasalamat man ang opisyal sa Bombo Radyo nga nangin kabahin ang iya amay sang sports coverage ilabi na sa patag sang basketball.
Bulan sang Abril ang ulihi nga interview sang Bombo Radyo Bacolod sa anay coach kun sa diin naghatag ini sang tribute sa anay player sang Negros Slashers nga si Manuel ‘Maui’ Huelar nga ginpatay sa Barangay Villamonte.
