Dakop ang 27 anyos nga distributor ukon kabayo sang iligal nga droga sa drug buybust operation nga ginpatigayon sa Purok Neptune, Barangay Singcang-Airport, Bacolod City.
Suno kay P/Maj Joery Puerto, hepe sa Bacolod Police Station 8, ang suspetsado ang ginkilala kay Justine Estaniel alyas Tarzan, 27 anyos, single kag residente sa nasambit nga lugar.
Ini ang natalana nga pasakaan sang kaso may kaangtanan sa section 5 kag 11 sang Republic Act 9165 ukon Comprehensive Dangerous Drugs Act of 2002 subong nga adlaw.
Pahayag ni Puerto nga kapin duha ka semana man nila nga ginmonitor ang suspetsado matapos nga natalupangdan nga ni ang sulod-gwa sa lugar tubtob sa nakapatigayon nga makatransaksyon diri.
Suno sa hepe, ginpahayag sang suspetsado nga ini ang anay manug-ihaw sang baboy apang nagfocus na ini sa pagbaligya sang iligal nga droga sang napinsaran nga ini ang mas may maayo nga income.
Ini ang newly identified drug personality kag sa karun ginakonsiderar nga street level individual (SLI).
Nakuha sa iya paghinakop ang 30 gramos sang suspected shabu nga nagabalor sang P204,000.
Sa imbestigasyon sang kapulisan, natumod nga ang source sang suspetsado sang iligal nga droga ang gikan pa sa syudad sang San Carlos.
Paathag ni Puerto nga nakamonitor ang Bacolod Police Station 8 nga ang duha nila ka target personalities ang nagakuha sang minilyon nga balor sang iligal nga droga gikan sa San Carlos City kag ginadagdag Purok Neptune, Barangay Singcang-Airport, samtang si Estaniel ang isa naman sa mga distributor ukon kabayo nga nagakuha sa mga ini sang droga.
