Negosyo ukon daan nga hiligut-anon ang ginalantaw nga motibo sang Cadiz City Police Station sa pagluthang-patay sa isa ka 44 anyos nga lalaki nga anay miyembro sang Revolutionary Proletarian Army-Alex Boncayao Brigade (RPA-ABB) sa ciudad sang Cadiz kahapon.
Sa interview sang Bombo Radyo kay Lt. Col. Robert Mansueto, hepe sang Cadiz City Police Station, ginpahayag sini nga padulong kuntani sa baranggay hall ang biktima nga si Jose Renante Fernandez, 44 anyos, residente sang Hacienda Habinay, Brgy. Daga, Cadiz City kag nahibaluan nga nagapautang sang kwarta.
Nagaangkas ini sa motorsiklo sang iya nga hinablos kag nagasunod man sa ila ang motorsiklo sang himata sini.
Suno kay Mansueto, ginsundan ang mga ini sang riding-in-tandem suspects kag sang yara na sa national highway sang Puting Tubig, Brgy, Daga, Cadiz City, gindikitan sila sang mga suspetsado kag ginluthang.
Gilayon nga ginpahigad sang hinablos sini ang motorsiklo kag nakalikaw sa mga luthang samtang nakaangkon naman sang patal nga pilas sa nawala nga bahin sang iya dulunggan si Fernandez.
Ginlagas pa sang mga himata sini ang motorsiklo sang mga suspetsado apang wala na naabtan.
Gilayon nga gindala sa ospital ang biktima apang gindeklarar nga dead on arrival.
Nakuha sa crime scene ang duha ka fired cartridge sang calibre .45 pistol.
Suno sa hepe, may yara na sila sang identity sang mga suspetsado kag sa karun, ginalantaw pa kun ano ang motibo sa krimen.
Suno sa iya, negosyo ukon daan nga hiligut-anon ang possible nga motibo sa insidente bangud naangot man si Fernandez sa isa ka shooting incident kag ginaalegar nga isa sa mga suspetsado diri
