Memorable para sa anay pinuno sang Provincial Planning and Development Office si late Negros Occidental Governor Daniel ‘Bitay’ Lacson Jr. bangod ini ang iya labing una nga gobernador sa pagpungko sa public office.
Sa interview sang Bombo Radyo Bacolod kay Dr. Ma. Lina Sanogal, indi gid sini malipatan ang anay gobernador bangod sang siya ang gin-endorse sadto ni former Governor Lito Coscolluela, nga amo ang Bise Gobernador sang 1991, si Lacson ang nagpirma sang iya first appointment.
Siya sadto ang ginbutang nga public information officer sa Office of the Governor.
Dako gid ang pagtahod sini kay Lacson bangod humalin 1988 tubtob 1992, nakita gid diri ang matuod-tuod nga serbisyo publiko.
Madumduman nga sa amo nga mga tion, natabo ang sugar crisis nga ginsundan pa sang paglugdang sang MV Don Juan, kun sa diin isa man si Lacson sa nagapanag-iya.
Apisar sini, naghimo sang mga programa ang anay gobernador agud mabuligan ang mga sugar planters kag farmers.
Didto man sini nakita nga ang tanan ang nagbuligay, gobyerno, pribado kag bisan mga ahensya sa luwas sang pungsod agud lamang mapabangod ang Negros Occidental.
Suno kay Sanogal, si Lacson ang nagserbe nga salesman nga nagapakadto pakari agud magpangita sang makabulig, kalakip na sa mga international agencies.
Samtang masako si Lacson sa pagpangita sang bulig, si Coscolluela naman ang naga-asikaso sang mga office works kag mga alatubangon sa probinsya.
Sa pihak nga bahin, bangod madamo sang mga sugar farmers ang nadulaan sang duta, si Lacson man ang nag-introduce sa pagtudlo sa paghimo sang lantern nga nag-umpisa sang ‘Star of Hope’ sang Negros samtang ini gid mismo ang nagbaligya sang mga produkto sa Manila.
Ginadayaw man ni Sanogal ang 15 years Master Development Plan ni Lacson nga makabig sini nga legasiya, ilabi na nga kalabanan sa mga proyekto ang nagdugay gid kag nagapabilin tubtob sa karun.
