Ginpasakaan na sang kaso ang suspect nga anay katapo sang Philippine Marines matapos magpinalupok sang armas-luthang kadungan sang pagsugata sang paskwa sa Purok Rosas, Barangay Balingasag, Bago City, Negros Occidental, sang Disyembre 24.
Sa interview sang Bombo Radyo kay Police Captain Emman Analecto, deputy chief of Police sang Bago City Police Station, ang suspect ang ginkilala nga si Jerson Pahilanga, 43-anyos, wala sang asawa, retired enlisted personnel sang AFP Marines kag residente sang nasambit nga lugar.
Suno kay Analecto, sang nakabaton sang report ang kapulisan halin sa isa ka pumuluyo, gilayon nga nagresponde ang mga kapulisan kag naabtan nila ang suspek nga naga-uyat sang armas sa gwa mismo sang iya balay kag yara sa impluwensya sang makahulubog nga ilimnon.
Suno sa mga residente, si Pahilanga ang may kalain sang buot sa iya nga mga kaingod balay nga ginapatihan nga isa sa mga rason kun ngaa ini ang nagpinalupok sang armas kag nagama-oy.
Samtang, nakita man nga ang tanan nga bala ang nagtupa sa duta kag wala man sang may napatay ukon nasamaran.
Napasakaan na ang suspect sang kaso nga grave scandal kag illegal discharge of firearms, kahapon sang aga.
Na-recover sa suspect ang isa ka .45 Caliber Pistol, anom ka ammunitions, isa ka empty magazine sang .45 caliber pistol, isa ka magazine sang .45 caliber pistol nga may unod nga 13 ka live ammunitions kag 34 ka fired cartridge cases sang .45 caliber.
Sa karun, ang suspect ang yara sa kustodiya sang Bago City Police Station.
