Ginkumpirmar ni anay Presidente Rodrigo Duterte subong nga Sabado, Oktubre 5 nga magapadalagan siya bilang alkalde sang Davao City.
Kasubong man, ginpahayag niya nga indi ini magpadalagan sa pagka-senador sa 2025 midterm elections bangud indi na masarangan sang iya lawas ang pagpakampanya para diri.
“You think that I can carry a national campaign at my age or you want me to die? Mag co-collapse na ako n’yan,” suni kay Duterte.
Una na nga ginpahayag ni Senador Robinhood Padilla nga tubtob sa karun nga ginaengganyo sagihapon nila si anay presidente Duterte kag isa sa mga anak sini nga magpadalagan bilang senador sa 2025 midterm elections.
Si Padilla ang sa karun presidente sang Partido Demokratiko Pilipino-Lakas ng Bayan (PDP-Laban) Duterte wing.
Suno kay Padilla, magahulat sila sang desisyon sang mag-amay nga Duterte tubtob sa ulihi nga adlaw sang pagfile sang kandidatura sa pagkasenador sang Oktubre 8.
Samtang, sang ginpamangkot si Padilla angot sa edad ni anay presidente Duterte, ginpahayag sini nga mas nagapangibabaw sagihapon ang wisdom.
