Dakop ang isa ka high value individual sa ginpatigayon nga drug buybust operation sa Purok Kagaykay, Barangay 2, Bacolod City, kaupod ang iya nga parokyano pasado alas-11:00 kaina sang aga.
Sa interview sang Bombo Radyo Bacolod kay Police Captain Glenn Montaño, station commander sa Bacolod Police Station 2, ang subject person ang ginkilala nga si Junel Dayun, 44 anyos, single, kag residente sa nasambitan nga lugar samtang ang parokyano sini ang ginkilala nga si Elmer Dela Cruz, 49 anyos, kasado kag residente sa Barangay 2 sa banwa sang EB Magalona.
Si Dayun ang napriso naman sadto bangod sa paghupot kag pagbaligya sang illegal nga droga kag nakagwa sang 2017.
Dyutayan naman ini nga madakpan sa nakaligad nga operasyon, apang ini ang madanlog dakpon.
Ginalantaw ni Montaño nga naubos ang swerte sini matapos mabaklan sang suspected shabu sa iya balay.
Nakuha sa paghinakop sini ang anom ka big kag tatlo ka elongated transparent plastic sachet sang suspected shabu, kalakip na ang buybust item.
Narecover naman ang duha ka elongated transparent plastic sachet sa iya parokyano.
Ang mga suspected shabu ang ginabanta nagabug-at sang 31 grams nga may standard drug price nga P210,800.
Suno kay Montaño, tatlo ang balay sang subject sa nasambitan nga Barangay kun sa diin ini ang nadakpan sa balay nga ginahimo sini nga drug den.
Siya ang nagabyahe naman sang tricycle bilang front sa iya illegal nga buluhaton.
Si Dela Cruz ang ginclassify naman nga street level individual.
