Arestado ang isa ka anay priso sa drug buybust operation nga ginpatigayon sang Kabankalan City Police Station, sa Barangay 9, ciudad sang Kabankalan, Negros Occidental, sang Huwebes sang hapon.
Ang arestado ang ginkilala nga si Danilo Abarro, wala sang trabaho kag residente sang nasambit nga barangay.
Sa interview sang Bombo Radyo kay Police Captain Joelan Vinzon, Deputy Chief of Police sang Kabankalan City Police Station, nakuha sa paghinakop ni Abarro ang siyam ka sachet sang suspected shabu nga nagabalor sang P122,400.
Nakumpiskar man sa suspetsado ang isa ka improvised glass tooter nga may traces sang suspected shabu.
Suno kay Vinzon, si Abarro ang makaagi na preso matapos nga ginserbehan sang search warrant sa illegal possession of firearms.
Dugang pa sini, madugay na nga ginamonitor sang kapulisan si Abarro nga nalakip sa drug watchlist sang Kabankalan PNP.
