Nagaduda ang anay Provincial Agriculturist sang Negros Occidental kun matuman ayhan sang gobyerno ang ginaduso nga P20 presyo sa kada kilo sang bugas.
Sa interview sang Bombo Radyo kay Atty. Japhet Masculino, manami kuntani ang plano nga panubuon ang presyo sang bugas apang ini magakinahanglan sang dako nga subsidy gikan sa gobyerno.
Suno kay Masculino, kaangay sa karun nga kun ginbakal sa 18 pesos ang kilo sang humay, paglab-ot sa merkado ini ginabakal sa 36 pesos kada kilo, kag ang 20 pesos nga iga-subsidized sang gobyerno madalagan sa P800 sa kada sako.
Dugang pa niya, amo man ini sa gihapon ang matabo kun imported ang bugas, kinahanglan sa gihapon sang gobyerno magtalana sang dako nga budget kun luyag gid sini nga i-implementar ang presyo nga 20 pesos.
Samtang, gin kwestyon man sang abogado ang pagbaligya sang Kadiwa Stallls sa 20 pesos nga kilo sang bugas kun tubtob san-o ayhan ang sarang sini nga magbaligya.
Pahayag ni Masculino, sa karun wala na sang ahensya sang gibyerno nga may regulatory power nga magatubang sa rice industry.
Dako man ang pagpa-abot sini nga mangin maayo ang lakat sang agrikultura ilabi na nga ang presidente mismo sang pungsod ang nagapangamot nga magnubo ang presyo sang bugas sa P20 per kilo.
