Ginkumpirmar sang hepe sang Murcia Municipal Police Station nga nakabaton sila sang impormasyon nga may mga drug personalities sa Negros Occidental nga nagacover sa anay Punong Barangay kag pugante nga napatay kahapon matapos ginaalegar nagbato sa mga otoridad sa ginpatigayon nga warrantless arrest sa iya puluy-an sa Purok 8, Barangay Minoyan, Murcia, Negros Occidental pasado alas 7:00 sang aga.
Sa interview sang Bombo Radyo kay Police Lt. John Paul Tabujara, ginpahayag sini nga ila ginsulod kahapon ang manokan kun sa diin nahamtang ang balay sang suspetsado nga si Jennifer Mercader, 44 anyos, kasado, residente sang Borbon, Cebu kag anay punong barangay sa Barangay Lugo, northern Cebu.
Suno kay Tabujara, ginakabig nga drug lord si Mercader bangud isa ini ka high value individual kag yara sa top 10 drugs watchlist sang Police Regional Office 7.
Suno sa hepe, nag-ayo ang mga otoridad sa suspetsado nga magsurrender sang matawhay kag atubangon ang iya mga kaso apang hinali lang ini nga nagpalupok gani wala sila sang may mahimo kundi magbato.
Hingagaw pa ini dala sa balaybululngan apang wala na sang kabuhi.
Narekober sa crime scene ang walo ka big sealed transparent plastic sachet sang suspected shabu, isa ka unit sang caliber .45 pistol nga may live ammunition kag fired cartridges kag isa ka unit sang 12 gauge shot gun.
Ang nakompiskar nga illegal nga druga ang ginabanta nagabalor P 472,000.
Suno sa hepe, nadakpan ang suspetsado sadtong Marso 2018 bangud sa kaso sa iligal nga druga kag illegal possession of firearms.
Ginmonitor sang Regional Intelligence Division sang PRO 6 si Mercader bangud naangot man ini sa iban pa nga drug activities sa rehiyon.
Suno sa report, si Mercader ang nakapalagyo sa Medellin District Jail sa Cebu sadtong Marso 5, 2020.
Ang suspetsado ang isa man ka self-confessed killer nga nag-ako sa pagpatay kay Police Lt. Col. Joie Yape, isa ka police officer sa Cebu.
Samtang, nakompirmar nga si Mercader ang naangot man sa pila ka mga drug activities kaangay sang buybust operation sang Agosto 27, 2020 sa Barangay Taculing, Bacolod City kun sa diin nakapalagyo ini apang natigayon nga mapasakaan sang kaso.
Sa karun, yara na sa punerarya ang bangkay ni Mercader kag ginahulat pa ang resulta sang autopsy agud mahibaluan kun pila ang igo sini.
Ginatinguhaan man sang kapulisan nga macontact ang pamilya sang suspetsado.
