Nagapati ang anay punong barangay kag karun nagapapili na bilang Kongresista sa 5th District sang Negros Occidental nga si Anthony “Makoy” Javelosa nga may lamod politika ang pagkaulamid sang pangalan sini sa pagsalvage kay Levy Ortega sa Purok 1, Barangay Aguisan, Himamaylan City sang Domingo.
Madumduman nga katupad sang bangkay sang 46 anyos nga biktima nga residente sa Barangay Estefania, Bacolod City ang isa ka placard nga may nakasulat “KAP MAKOY NASA IYO PALA SI BEBOT MURILLO AT BOY TAPANG…SEE YOU NEXTIME… BY: JJ.”
Ang Kap Makoy ang nagatumod naman sa anay Punong Barangay nga karun nagapapili na bilang 5th District Congressman.
Ini ang 11 ka tuig nga nangin punong barangay sa Barangay Aguisan apang wala naman ini nakapapili sa sulod sang duha ka eleksyon.
Suno kay Javelosa, indi sini kilala ang biktima nga si Ortega kasubong man ang ginapahayag nga Boy Tapang.
Apang kilala naman sini si Bebot Murillo.
Suno diri, napangasawa sang tiyo sini sa pakaduha ang magulang ni Murillo, gani indi sila maghimata.
Taga Bago si Murillo kag tumalagsahon lang nga makasaboy sa syudad sang Himamaylan.
Suno diri, si Murillo ang wala sang trabaho apang ang asawa sini ang nagatrabaho sa korte.
Ini ang wala man nakaagi nga mangin public servant.
Suno kay Javelosa, tatlo sila ang magkasumpong sa pagka-kongresista nga ginalakipan sang incumbent 5th District Congresswoman nga si Ma. Lourdes Arroyo kag ang isa pa nga independent candidate man kaangay sa iya.
Alegasyon ni Javelosa nga may isa ka intelligence officer nga pulis ang nagsugid sa iya nga pulis ang nagpatay kay Ortega kag ini ang ginsugid sang contractor nga tawo ni Arroyo.
