Bacolod City-–Ginpakigbahin sang isa ka rebel returnee nga karun isa na ka suldado ang istorya sa likod sang iya pagbiya sa New People’s Army (NPA) kadungan sang programa kahapon nga ginpatigayon sang 303rd Infantry Brigade (IB) sang Philipine Army kahapon.
Kahapon ginpresentar sang 303rd IB sa pagpamuno sang ila commander nga si Col. Alberto Desuyo ang 79 ka mga bag-o rebel returnees kay Gov. Alfredo Marañon Jr.
Kalakip diri si Private First Class (PFC) Elmer Almojero nga anay squad leader sang NPA sa probinsiya.
Si PFC Almojero ang lima ka tuig na nga suldado samtang nagdangat naman sa walo ka tuig ini nga nangin miembro sang NPA.
May duha na ka magagmay nga kabataan si Almojero sang nagsulod sa NPA kag nagsalig ini sa pangako sang hublag nga suportahan sang mga ini ang iya pamilya.
Sa una nga tatlo ka tuig sa grupo, todo ang trabaho sini nga wala na nakapauli sa iya pamilya kag nagasalig nga ginahatagan ang mga ini sang bulanan nga allowance.
Apang iya natukiban nga wala nagtupa ang mga pasalig tubtob nakit-an sini ang tuman nga kaniwang nga panglawason sang iya kabataan sang nagbalik siya sang mga ini.
Diri kag nagsugod ang pagkadisgusto ni Almojero sa NPA rason nga nag-AWOL siya kag nagbalik sa iya pamilya.
Apang nagbalik naman siya sa grupo sang nangin wanted ini sa kasuguan tubtob nga nagdangat sa walo ka tuig ang iya pag-upod sa grupo ugaling naguwa man ini sang ulihi.
Sa karun, katapo na ini sang Philippine Army.
