Patay ang isa ka mangunguma matapos nga ginluthang sa Barangay Bagonbon, ciudad sang San Carlos, Negros Occidental, Martes, Enero 7 sang aga.
Ginkilala ang biktima kay Elebrito Ancero, 51 anyos, kasado kag residente sang Sitio Katugisan, Brgy. Bagonbon, San Carlos City.
Sa interview sang Bombo Radyo Bacolod kay Police Major Ryan Villasario, deputy chief of police sang San Carlos City Police Station, ang biktima ang naglawig sang iya baka sang ini ang ginbantayan sang mga wala makilal-an nga suspetsado kag ini ang ginluthang.
Suno kay Villasario, nakaagom ini sang igo sang bala sa nagkalain-lain nga bahin sang iya nga lawas nga gintuna-an sang iya nga kamatayon.
Narecover sa crime scene ang isa ka empty shell sang 5.56 caliber.
Suno diri, padayon pa ang ila nga imbestigasyon agud nga matumod ang motibo sa pagpatay sa biktima kasubong man ang suspek sang krimen.
Ginpahayag man ni Villasario nga ang biktima ang isa ka mangunguma nga anay miyembro sadto sang Revolutionary Proletarian Army-Alex Boncayao Brigade (RPA ABB) apang nagbalik sa sabak sang gobyerno.
Nagapanawagan man ini sa nakakita ukon may nahibaluan sa nagluntad nga insidente magpakig-angot lamang sa mga kapulisan agud nga mabuligan ang imbestigasyon kag masolbar ang kaso.
