Nadakpan na sang mga miyembro sang Bacolod Police Station 2 ang isa sa ginakabig nga most wanted persons sang estasyon.
Suno kay Police Capt. Paul Vincent Pendon, station commander sang Police Station 2, si Julius Balandra, sultero, 29-anyos kag residente sang Purok Sigay, Barangay 2 ang ginserbehan sang warrant of arrest sa corner Pablo O. Torre-23rd Streets, Barangay 5, Bacolod City.
Siya ang nagapangatubang sang kaso nga paglapas sa Section 11 sang Republic Act 9165 ukon Comprehensive Dangerous Drugs Act of 2002.
Si Balandra ang anay tinawo sang top drug personality sa Bacolod nga si Gerald Cuadra nga ginpatay sang May 16, 2020.
Suno kay Pendon, si Balandra ang nadakpan sang July 5, 2015 sa kaso nga pagbaligya sang illegal nga druga apang nakagwa ini matapos magpyansa.
Tuig 2016, nangin subject man si Balandra sang drug buybust operation apang ini ang nakapalagyo kag nagpanago sa otoridad.
Sang napatay si Cuadra, nagpadayon ini sa pagpanago apang sang nagtahaw na, nag-ubra ini sa Riverside Medical Center.
Natiktikan sang Police Station 2 ang iya nga presensya sa ciudad gani ini ang ginmonitor tubtub nga naserbe ang mandamiento de aresto batok sa iya.
