Ginpamatud-an sang isa ka anay security guard sang St. Theresa’s College sa Cebu City nga wala sang imposible sa tawo nga nagatinguha agud malab-ot ang handum.
Si Erwin Valmoria Macua nga nagtapos bilang cum laude ang nangin manunudlo sa nasambit nga eskwelahan.
Si Macua ang nag-eskwela sang Civil Engineering sa Bohol, apang napilitan siya nga mag-untat sang 1997 bangod indi na masarangan sang iya ginikanan nga mangunguma ang galastuhon sa iya pag-eskwela.
Nagsaylo si Macua sa Cebu kag sang 2000, nagtrabaho bilang security guard sa St. Theresa’s College.
Sang 2013, nagdesisyon siya nga magbalik sa pag-eskwela matapos kag nagkuha sang kurso nga Bachelor of Elementary Education samtang nagapadayon sa iya full-time nga trabaho bilang security guard.
Nagatrabaho si Macua sa night shift halin alas-7 sang gab-i tubtob alas-7 sang aga kag nagasulod sa klase halin alas-7:30 sang aga tubtob alas-4 sang hapon.
Apisar nga kulang sa tulog kag may responsibilidad sa iya asawa kag tatlo ka kabataan, nangin consistent Dean’s Lister siya.
Nabuligan man siya sang eskwelahan paagi sa 50-percent nga tuition discount, samtang may mga alumni kag ginikanan nga nagbulig sa iban pa niya nga gastuhon sa pag-eskwela.
Sa gab-i antes sang iya graduation, nag-duty pa sa gihapon si Macua.
Nag-review si Macua para sa Licensure Examination for Teachers (LET).
Sang Nobyembre 2017, nabalitaan niya nga nakapasar siya sa September 2017 LET.
Sang 2018, ginhire siya sang St. Theresa’s College bilang grade school teacher.
Sang nagbalik siya sa campus bilang manunudlo, ang mga estudyante kag ginikanan nga nagatawag sa iya sadto sang “Kuya Guard” ang nagatawag na sa iya subong sang “Sir.”
