39 ka gunshot wounds ang naagom sang 34-anyos nga anay security guard nga gintiro sang wala pa naidentify nga mga suspetsado sa 20th Lacson Street, Barangay 4, ciudad sang Bacolod kagab-i.
Suno sa station commander sang Bacolod City Police Station 2 nga si Police Capt. Paul Vincent Pendon, ang biktima nga si Joselito Villanueva sang Purok Rosal, Barangay Singcang Airport ang nakaagom sang gunshot wounds sa nagakalain-lain nga parte sang iya nga lawas.
May yara man sang narecover nga 37 pieces sang deformed fired bullets sa area sang krimen.
Wala naman narecober ang sling bag sang biktima kun sa diin nasulod ang cellphone sini nga may yara sang text message sang pagpamahog sa iya nga kabuhi dala na ang bug-os nga pamilya sang bulan sang Hulyo sang tinalikdan nga tuig nga makabulig man kuntani sa imbestigasyon.
Ginhambalan pa sang live-in partner sini nga si Kimberly Mendoza ang nagtaliwan nga kahagugma nga indi pagpanason ang text message.
Sa karon ginalantaw pa sang mga kapulisan ang mga CCTV footages malapit sa ginluntaran sang krimen agud matumod ang mga suspetsado nga indi magnubo sa duha.
Magapatigayon man sang backtracking angot sa background kag mga aktibidades sang biktima antes ini ginpatay kagab-i.
Nahibaluan nga ang biktima ang isa anay ka chief security guard sa RHN Security Agency kag sang nagligad tuig lang naghalin sa iya trabaho
