Nasubuan ang anay administrator sang Sugar Regulatory Administration (SRA) bangud kaangay nga wala nakaintindi si President Ferdinand “Bongbong” Marcos Jr. sang sitwasyon sang sugar industry matapos nga ini ang nagpahayag nga sa bulan sang Oktubre mahimo mag-import sang kalamay, apang mas manubo kun ikumparar sa 300, 000 metric tons nga nakasaad sa kontrobersyal nga Sugar Order No. 4 sang SRA.
Sa interview sang Bombo Radyo Bacolod kay Rafael Coscolluela, nagmeeting na ang food manufacturers ukon industrial users kag ang presidente kahapon agud nga diskusyunan ang kabudlayan sa pagpangita sang supply sang kalamay nga gamiton sa ila mga negosyo.
Suno kay Coscolluela, nagasugod na sa karun ang pressure sa pagpangita sang solusyon sa problema.
Ginpahayag man sini nga indi timely ang paghatag sang solusyon sa problema kun sa bulan pa sang Oktubre mapasulod sang gin-import nga kalamay bangud sa sini nga bulan nagaumpisa na ang peak milling season.
Ginpahayag man ni Coscolluela nga sa tion nga matapos ang crop year ginacompute sang SRA kun pila ang stock balance sa kalamay kag ginabinlan gid ini sang 300, 000 metric tons agud mangin stabilized ang presyo sang kalamay.
Suno kay Coscolluela, kun indi pagpasudlan sang imported nga kalamay, mahimo nga manegative na ang stock balance.
Bangud negative na ang stock balance sang kalamay, magasaka na gid ang presyo sini.
Suno kay Coscolluela, wala ginahatagan sang nakaigo nga solusyon sang gobyerno ang ginapangatubang nga problema sang sugar industry.
Nagpanugyan man ini nga dapat timely ang pagsolbar sang problema.
