Ginkumpirmar sang Special Joint Task Force Negros nga diri sa probinsya sang Negros Occidental nagsungka ang anay suldado nga nag-ako nga may kaangtanan sa assassination ni Negros Oriental Governor Roel Degamo sang Marso 4.
Sa interview sang Bombo Radyo kay Major Cenon Pancito III, spokesperson sang Special Joint Task Force Negros, nagsungka sang weekend ang isa ka suspetsado.
Sang Biyernes, may nagpadala sang surrender feeler nagikan sa Manila kag isa man ini ka anay ka suldado.
Sang Sabado, isa ka team nagikan sa Manila ang nagpadulong sa Negros para sa pagsurrender sang anay suldado gani ginhatagan sila sang security ang Joint Task Force Negros.
Suno kay Pancito, natigayon ang pagsurrender sa isa ka banwa sa Negros Occidental alas-8:30 sang aga sang Sabado.
Gilayon nga gindala sa Metro Manila ang anay suldado bangud didto ang iya mga kaupdanan agud nga macrosscheck ang identity sini.
Sang Lunes, ginkumpirmar ni DILG Secretary Benhur Abalos nga may direkta nga nahibaluan ang anay suldado sa Degamo assassination.
Indi pa man mapagwa ang ngalan sini bangud sa security reasons.
Sa karon, anom na ka mga suspetsado ang yara sa kustodiya sang mga otoridad kag apat pa ang ginapangita nagikan sa 10 ka mga suspects.
Suno kay Pancito, amat-amat na nga nagabalik ang normalcy sa Negros Oriental apang hugot gihapon ang pagbantay sa bilog nga isla sang Negros bangud may possibility nga spillover ini sa Negros Occidental.
