Magka-upod nga nag-perform ang anay Taiwanese boyband nga F4.
Ang iconic band nga ginabug-usan nanday Jerry Yan, Vic Chou, Vanness Wu, kag Ken Chu, ang naghimo sang special appearance sa 25th anniversary concert sang Taiwanese rock band nga Mayday.
Gin-perform sang apat ang ila hit song nga “Meteor Rain” upod sa Mayday members.
Ang F4 ang gintukod sang 2001 kasunod sang kadalag-an sang ila hit Taiwanese drama nga “Meteor Garden” kun sa diin naka-upod nila ang nagtaliwan nga aktres nga si Barbie Hsu.
Bilang boy band, gin-release nila ang tatlo ka mga album nga amo ang “Meteor Rain” sang 2001, “Fantasy 4ever” sang 2002 kag “Waiting For You” sang 2007.
Ulihi nga nakita nga magka-upod ang grupo sang 2020 para sa “One Thousand and One Nights” event sang isa ka TV network.
