Nagapati si anay US President kag Republican candidate Donald Trump nga dapat nga maglunsyar sang strike ang Israel sa nuclear facilities sang Iran bilang balos sa asod-asod nga pagrelease sang missile sang Iran sa Israel.
Ini ang sabat ni Trump sang ginpamangkot samtang yara sa iya campaign event sa North Carolina kaangot sa posible nga pagtarget sang Israel sa nuclear program sang Iran.
Ginbanatan man ni Trump ang nangin sabat ni US President Joe Biden sang ginpamangkot ini sa nasambit nga topiko sang Miyerkules.
Ini bangud nagpahayag sang pagpamalabag si Biden sa posible nga strikes batok sa nuclear sites sang Iran.
Ginpahayag naman ni Trump nga dapat nga unahon nga iguon ang nuclear weapons nga ginlaragway sini nga pinakadako nga pamahog.
Samtang, ginpahayag man ni Trump nga luyag sini makapanag-iya ang Amerika sang iron dome nga may yara sang Israel kasunod sang missile barrage nga ginrelease sang Iran sa Israel.
Ginbida ni Trump kun ano ka epektibo ang nasambit nga air defense system sa pag-intercept sang dalagko nga ballistic missiles nga ginlunsyar batok sa Israel.
Ginpahayag man ni Trump nga himuon sang nasambit nga iron dome sa Amerika kag ibutang ini sa North Carolina, ang lugar nga gintumod mismo ni Trump.
