Naghambal si anay President George W. Bush subong man si Vice President Kamala Harris sa September 11 memorial sa Shanksville, Pennsylvania, kun sa diin nagcrash ang United Flight 93 matapos nakigbato ang mga pasahero kag nalutos ang mga hijackers.
Gindumdum ni Bush ang kaisog sang nasambit nga mga pasahero sa tunga sang pagpamatay nga nagakatabo sa bilog nga pungsod.
Suno diri, ang mga targets ang nangin instrumento sang kaluwasan kun sa diin utang sang mga nagakabuhi sa karun ang ila mga kabuhi diri.
Ginhatagan man sini pagtamod ang pag-isa kag pagkabaganihan nga nagluntad sa tion sang pagpang-atake kag ang pagbulig sa isig-kapareho.
Nagpaandam man ang anay presidente sa nagapabilin nga pagpamahog sang terorismo lunsay foreign kag domestic.
Suno kay Bush, may yara sang gamay nga cultural overlap sa tunga sang bayolente nga mga extremists abroad kag mga bayolente nga extremists sa pungsod.
Magkaangay ang mga ini nga malain nga espirito kag padayon ang ila responsbilidad nga iconfront ang mga ini.
Gindayaw man sini ang mga beterano kag armed service members sa pungsod nga nagserbi humalin sang pagpang-atake.
Suno sa iya, wala sang may makahigko sa ila mga accomplishments kag wala sang katapusan ang pagpasalamat sang pungsod sa mga ini
Ginpahayag naman ni Vice President Kamala Harris nga ang natabo sang Setyembre 11, 20 ka tuig na ang nakaligad ang nagapakita sang gahom sang pag-isa kag ang ini nga sentimento ang makagagahom sa gihapon tubtob sa karun.
Nagpanawagan ang bise-presidente samga Americans nga padayunon ang ini nga camaraderie.
Suno kay Harris, sa tion sang kahadlok, makaatubang ang isa kag isa sa isa kag isa.
Sa itsura sang isa ka estranghero, makit-an ang isa ka abyan.
Gindugang man sini nga ang natabo sang 2001 ang nagapadumdum sang importansya sang pag-isa sa pungsod bilang Amerikano kag posible ini sa America.
Gin-updan naman sanday anay Presidents Barack Obama kag Bill Clinton, anay Secretary of State Hillary Clinton kag anay first lady Michelle Obama sanday President Joe Biden kag first lady Jill Biden sa National September 11th Memorial & Museum ceremonies.
Ginmarkahan kahapon ang ika-20 ka tuig humalin sang gin-atake sang mga terorista ang Estados Unidos kun sa diin kabug-usan nga 2,977 ka mga persona ang nadulaan sang kabuhi, kalabanan diri ang mga New York City responders.
