Patay ang nagaangkas sa motorsiklo matapos nga madalasa sang truck sa Barangay Caduhaan, Cadiz City, Negros Occidental kahapon sang hapon.
Ang Yamaha Moi nga motorsiklo ang ginadala ni John Paul Ladrillo, 30 anyos, single, residente sang Barangay Zone 1, Cadiz City samtang ang angkas naman sini ang ginkilala kay John Eurich Depasupil, 28 anyos, single kag residente sang Barangay Banguerohan, Cadiz City.
Samtang ang driver naman sang Mitsubishi Cargo Truck ang ginkilala kay Mario Bendevel, 47 anyos, may asawa kag residente sang Malasibog, Escalante City.
Santo sa inisyal nga imbestigasyon, sa kaangay nga dereksyon ang padulongan sang motorsiklo sa truck nga padulong sa Caduhaan proper gikan sa Cadiz City.
Ang truck ang nagaagi sa inner lane samtang ara naman sa outer lane ang motorsiklo.
Apang bangod sa wala pa matapos nga dalan, maga-overtake kuntani ang motorsiklo sa truck apang nadulaan ini sang kontrol kag nakadangat sa lane sang truck.
Aksidente ini nga nadalasa sang truck gani nag-angkon sang injuries ang mga biktima.
Gindala sa Gustilo Memorial District Hospital ang driver sang motorsiklo nga si Ladrillo gamit ang ambulansya sang banwa sang Toboso.
Ang angkas naman nga si Depasupil ang gindala sa Cadiz City Emergency Clinic apang gindeklarar nga dead on arrival.
Ang driver sang truck nga si Bendevel ang nakahunong sa kustodiya sang Cadiz City Police Station.
