Patay ang backrider sang isa ka motorsiklo matapos magtabog kasunod sang pagbunggo sini sa prime mover truck sa Airport Intersection, Barangay Bagtic, Silay City, Negros Occidental sang Biyernes, Enero 17.
Sa inisyal nga imbestigasyon sang mga kapulisan, ang Vehicle 1 (Prime Mover Truck) ang ginamaneho ni Celso Requiron, 55 anyos kasado kag residente sang Barangay Balintawak, Escalante City, Negros Occidental samtang ang vehicle 2 ang (Kawasaki Rouser) ang ginamaneho ni Joe Art Pastorpile, 21 anyos, single kag residente sang Hacienda Colisap 3, Barangay Hawaiian, Silay City ang nagabiyahe halin sa Silay Airport padulong sa Silay City proper.
Apang pagdangat sa nasambitan nga lugar aksidente nga nakabunggo ang motorsiklo sa prime mover truck.
Nakaagom sang patal nga pilas ang angkas sang motorsiklo nga si Carol Cristine Canoy, 19 anyos kag residente sang Hda. Riverside, Barangay San Isidro, EB Magalona, Negros Occidental.
Gindala pa ini sa Teresita Jalandoni Hospital sa ciudad sang Silay agud madapatan sang nagakaigo nga pagbulong apang ini ang wala matabangan.
Nagapabilin sa karun sa Talisay City Police Station ang driver sang prime mover truck kag ginahulat nalang ang desisyon sang pamilya sang nagtaliwan nga angkas sang motorsiklo.
