Indi kumporme ang animal advocate sa ginaduso nga pagpatuman sang death penalty para sa animal cruelty, sa panindugan nga ini ang kinahanglan pa sang madalom nga pagtuon.
Ini matapos nga ginpanindugan ni Cavite 4th district Representative Francis “Kiko” Barzaga nga nakilala bilang “Congressmeow” nga ipakigbato sini ang pagfile sang hagna nga mapatuman ang death penalty paagi sa firing squad sa mga naga-abuso sang kasapatan.
Sa interview sang Bombo Radyo Bacolod kay BACH Project Shelter Manager Spy Dekeling, para sa iya extreme katama ang pag-implementar sang death penalty.
Panindugan sini nga madamo sang category ang animal cruelty santo sa Animal Welfare Act, kun sa diin malakip man diri ang irresponsible pet owners.
Gani indi ini kumpormi nga death penalty gilayon ang ipatuman, sa baylo mahimo lamang nga life imprisonment ukon mas mataas nga number of sentence.
Aminado si Dekeling nga sensitibo nga topiko ang death penalty kag segurado ini nga madamo sang grupo nga magapamatok, ilabi na nga bisan ang mga heinous crimes kaangay sang rape ang wala sang death penalty.
Bilang animal advocate, para sa ila ‘animal welfare is human welfare’ vice versa.
Panugyan sini nga tun-an anay sang maayo antes magfile sang hagna, kag mas maayo nga tumuron ang ugat kun ngaa may nagakatabo nga pagpang-abuso sang kasapatan kag ini ang una nga solusyonan.
