Nagapanawagan ang isa ka Independent Animal Welfare Advocate sa mga pumuluyo nga magbulig sa pagpakaon kag pagpainom sa mga layaw nga ido kag kuring sa dalanon apang kun indi nila ini mahimo, nagahingyo ini nga indi lang nila pasakiton ang nasambit nga mga sapat.
Sa interview sang Bombo Radyo kay Mary Grace Gonzales, ginpakigbahin sini nga madugay na sini nga palangga ang mga sapat kag ginpatuman ang lockdown sa Bacolod, didto siya nagsugot pakaon sa mga layaw nga ido kag kuring.
Suno sa iya, kada adlaw sadto nagapakaon ini sang kapin 30 ka mga ido nagikan sa Lopues East padulong sa Sta. Fe sa bulig man sang iban nga mga animal welfare advocates.
Nagresponde man ini sa nagluntad nga mass killing sini nga bulan sa isa ka subdivision sa Barangay Granada kun sa diin walo ka mga ido kag isa ka kuring ang nasapwan nga nagabinaho sa dalan kag ginaalegar ginhiluan.
Suno kay Gonzales, iresponsable nga pet ownership ang masami nga rason kun ngaa madamo sang mga layaw nga ido sa dalanon.
Gindugang man sini nga dapat iimplementar sang local government unit ang ordinansa nga nagaprotekta sa mga sapat.
Gin-athag man sini nga indi magkaangay ang City Pound kag shelter bangud ang city pound ang napaidalum sa local government unit samtang ang shelters ang ginapanag-iyahan sang mga pribado nga indibidwal ukon NGOs.
Ginhangkat man ni Gonzales ang mga pumuluyo nga magbisita, mag-adopt kag magfoster sang mga layaw nga ido.
Ginpakigbahin sang bise presidente sang Community Animal Rescue Efforts (CARE) Bacolod nga ang mission sang ila nga programa amu ang mag-edukar sa mga pumuluyo kag macontrol ang populasyon sang mga layaw nga ido kag kuring.
Sa interview sang Bombo Radyo kay Ai Ai Gamboa, ginpahayag sini anum ka tuig ang nakaligad sang siya ang nagpamiyembro sa CARE apang suno diri, ini ang gintukod bangud sa nagakatabo sa Bacolod City Pound kun sa diin ginatambutso kag ginalubong buhi ang mga ido.
Bangud diri, suno kay Gamboa, naghimo sang awareness kag nagtukod sang shelter ang founder sang CARE agud marescue ang mga ido.
Suno sa iya, ang nasambit nga animal welfare group ang rehistrado man sa Security and Exchange Commission kag gina-acknowledge sang Bureau of Animal Industry.
May yara man sila sang clinic agud makabulig sa mga pet owners kag rescuers agud indi magdamo ang mga layaw nga ido sa dalan.
May yara sila sang programa nga libre kag low cost pay nga kapon kag sa masunod nga bulan, sila ang magapanglibot sa mga barangay agud manghatag sang kapon kag mag-educate sa mga pumuluyo.
Gindugang man sang bise-presidente nga madamo na sila sang narescue kag kun kaisa wala naganubo sa 20 kada adlaw gani nagpangayo ini sang pasensya sa iban nga indi nila macater.
Luyag man sini nga ipaathag nga volunteerism ang ila ginaubra bangud bilang NGO, wala sila napaidalum sa gobyerno.
Nagpanugyan man si Gamboa sa mga pet owners nga mangin responsible kag tatapon sang maayo ang mga sapat nga ila gina-atipan.
