Napanghatag na sa mga manunudlo sa Department of Education division of Negros Occidental ang ila P7,000 annual medical allowance.
Sa interview sang Bombo Radyo Bacolod kay DepEd-Negros Occidental Spokesperson Ian Arnold Arnaez, napanghatag na nila ang allowance antes paman natapos ang bulan sang Agosto paagi sa ATM sang mga manunudlo.
Paathag sini nga gintinguhaan gid sang DepEd Negros Occidental nga macomply ang mandato nga mahatag ang benepisyo antes matapos ang bulan sang Agosto.
Nagapati ini nga 100 porsyento na ang nakabatun apang ang ila lamang nga finance department ang makadisburse kun pila ang kabug-usan nga napagwa nga pondo, apang may-ara sang kapin 11,000 tubtob 12,000 nga manunudlo sa division kag kapin 2,000 naman ang non-teaching personnel.
Antes paman, nagpatigayon na ang mga ini sang survey ukon consultation sa mga DepEd personnel kun luyag nila sang agency procurement ukon individual availment.
Sa agency procurement, ang DepEd Negros Occidental amo ang magabid sa pagpangita sang ospital nga naga-offer sang kinahanglan nga medical benefits santo sa requirements, apang sa individual availments ang P7,000 ang ihatag derekta sa mga manunudlo kag sila na ang bahala kun paano ini gastuhon.
Nagalaom naman si Arnaez nga ini ang gamiton sa intended purpose.
Apang apisar napanagtag na individually, paathag ni Arnaez nga sarang gihapon makapatigayon sang group procurement ang mga manunudlo paagi sa ila nga mga union.
