Nagpanugyan ang Philippine Red Cross Negros Occidental Bacolod City Chapter sa mga madonar sang dugo sa Dugong Bombo sa City Mall Mandalagan nga magpreparar sang maayo.
Sa interview kay Eloisa Marie Liza, Donor Recruitment Officer sang PRC-NOBCC, kinahanglan nga magpractice sang healthy nga lifestyle bangud kinahanglan nga yara sa kondisyon ang lawas kun magadonar sang dugo.
Gindugang niya man nga dako ang posibilidad nga indi mangin successful ang blood donation kun nahadlok, kulang sa tulog, nagapanigarilyo kag dehydrated.
Aminado ang recruitment officer nga masakit gid man kun makuhaan sang dugo apang suno sa iya, indi ini magdugay kag sa gamay nga sakripisyo, madamo ka na sang mabuligan.
Suno sa iya, 5 to 10 minutes lang ang pagkuha sang 450 CC ukon 450 ML nga dugo apang kinahanglan pa sa gihapun nga magpabilin sa hiligdaan sa sulod sang 10-15 minutes bangud dako ang posibilidad nga maglingin ang ulo ukon malipungan kun magtindog gilayon.
Nagpahanumdum man ini sa mga madrive pagkatapos nga magdonate sang dugo nga magpahuway sang isa ka oras antes magbyahe liwat.
Gindugang niya man nga likawan ang paghakwat sang mabug-at ukon pag-exercise matapos ang blood donation agud indi maglagob ukon magbukas ang pilas.
